Turbeskrivelse

Dersom forma er rimeleg bra, og du har erfaring med å gå i litt ulendt terreng, kan du gjerne ta ein rundtur i Glomsdalen. Rundturen er på ca. 6,5 km og knapt 400 høgdemeter. Du bør berekne 4 timar på turen.

Det kan vere lurt å gå i retning Segestad og ta avstikkarar til Glomnesfossen og Hellskora.

Frå Segestad går du vidare til Segestadsetra, kryssar ei bru og kjem til Glomnessetra. Så går du tilbake på austsida av Glomsdøla. Sjå kartet.

Stien kan i enkelte parti vere litt krevjande å gå.

Du kan parkere på parkeringsplassen 200 meter frå Glomnestunet. Hugs å betale avgift.

Du går gjennom Glomnestunet, kryssar brua over Glomsdøla og tek av mot høgre opp ein bratt bakke.

Stien til Segestad er lett å finne, men slitasjen er stor, og i enkelte parti må du gå forsiktig!

Like før stien svingar seg opp gjennom det brattaste partiet mot Segestad, kan du sjå eit skilt som peikar mot Hellskora. Det er berre ein kort avstikkar til dette flotte utsiktspunktet!

Vegen svingar seg vidare opp Hamrane. Her er det bratt og nokre stadar mykje skoten stein i stien. Gå forsiktig.

Så kjem du til Storekvile. Der kan du setje deg på ein benk, kvile ut og nyte utsikta.

Når du kjem til Segestad, bør du ta ein tur innom låven. Her finn du eit lite gardsmuseum med gamle reiskapar og plansjar som fortel historia om denne fjellgarden. Det er Svein Inge Sunde som har laga utstillinga.

Stovehuset står slik som det var då den siste brukaren fall bort i 1961. Det står ope for dei som vil ta ein titt.

Segestad Vener og Svein Inge Sunde har gjort ein stor jobb med å halde husa på garden ved like!

Ovafor husa på Segestad går stien forbi ruinane etter ein husmannsplass som vart teken av eit snøras i 1902. Husa vart ikkje bygde opp att etter dette.

Eit kort stykke vidare langs stien møter du Kupegrova. Under snøsmeltinga og etter kraftig regnvêr kan det vere vanskeleg å kome seg tørrskodd over. Enkelte år kan det gå snøskred her.

Frå Segestad går stien i jamn, lett stigning innover dalen. Nokre plassar er stien smal, og vegetasjon kan gjere det vanskeleg å sjå kvar ein skal stige. Ver obs!

Eit stykke forbi Kupegrova kan du sjå ein minnestein tett ved stien. Det var her Oskar Tenden omkom i 1996. Han glei på isen i grovafaret like ved og hamna i ein djup høl i Glomsdøla.

På Segestadsetra er terrenget ope og fritt, og du får eit mektig utsyn mot dei majestetiske fjella ved Oppstrynsvatnet. Her er det fint å ta ein matpause før du går vidare mot Glomnessetra. Det er benk å sitje på og reint vatn i elva.

Dersom du ser deg rundt, vil du sjå eit gammalt falleferdig steinsel mellom nokre kjempestore steinar. Dette er Gardsselet, som tilhøyrde Gardsbruket (br. nr. 3) på Hjelle. Dei fekk selrett og beiterett her på slutten av 1800-talet etter ein “bytehandel”.

Like innafor kan du sjå tuftene etter Segestadselet rett ved ein stor stein. Innselet var tømra og utselet var i bindeverk. Selet vart ikkje halde vedlike, og etter 1925 delte dei på Gardsselet.

Murane som du kan sjå ved ein stor stein nærare elva, er restane etter ein fjøs som dei to bruka truleg brukte i lag.

Det er imponerande å sjå kor godt vern alle bygningane har hatt mot steinsprang og snøras.

Etter ein god pause på Segestadsetra går du vidare over brua, og det er berre eit kort stykke til Glomnessetra. Der passerer du først eit gammalt steinsel som står til nedfalls. Det er Valsnosselet. Like etter møter du to sel som er bygde i seinare tid. Eigarar er Lars Helge Kveen og Alf Terje Glomnes.

På Glomnessetra var det setrekvie med høy-slått. Det eine bruket hadde utløe på setra. På det andre bruket bar dei turrhøyet i børar heim til næraste løypestreng. Eller dei la det til mellombels lagring i ei av utløene på Kvilefloten. Glomnessetra var den siste setra i Oppstryn der det vart drive høyslått.

Det vart slutt på mjølking kring 1950. Det gjeld også Segestadsetra.

Frå Glomnessetra til Kvilefloten er det slak unnabakke. Stien er god, og det er lett å gå.

Frå Kvilefloten går stien i bratt unnabakke. Underlaget er laust og ujamt, og du må gå forsiktig.

Når du kjem ned til innmarka, følgjer du stien ovafor gjerdet til parkeringsplassen.

Det går sauer på beite. Hugs at hunden må gå i band! Vis omsyn, og lat att alle grinder på vegen!