Vetledalen - ved foten av Jostedalsbreen
Vetledalen er ein av innfallsportane til Jostedalsbreen, og ei gamal seter der det vart ysta geitost fram til 1928, og laga smør og gamalost av kumjølka. Etter 1928 gjekk ikkje geitene til seters og mjølka frå kyrne vart boren heim. I 1954 vart siste mjølkebøra boren heim frå Vetledalen, og sidan har det berre gått beitedyr som ikkje mjølkar. No er det kun storfe som beitar i den grøderike dalen.
Turen startar frå garden Greidung fremst i Erdalen, med bomveg vidare til Loppeset. Her er det flott utsyn tilbake heimover dalen. Stien går så inn i skogen og svingar forbi Hesthammaren. Etter ein motbakke flatar stien litt ut over Langesvodene. Turen fram til Erdalssetra er omlag to km.
Vidare framover breelvslettene er det flatt og fint å gå før ein kjem til høgdedraget Reset. Dette er grensa mellom Erdalssætra og Vetledalen med flott utsikt heimover gardane mot Erdalssætra. Dette er ei av dei største breelvslettene i Norge, avsett av smeltevatn frå brear som gjekk ned i dalen for hundrevis av år sidan.
Etter omlag 2,5 km er vi framme på Vetledalen. Her delar dalen seg i to, Stordalen og Vetledalen.
Turlagshytte
INT-hytta stod opprinneleg ved Hjelle Hotell, men vart kjøpt av breførar Rasmus T. Greidung og flytta til Vetledalen i 1923. I 1940-åra overtok Tor, son til Rasmus, hytta på Vetledalen. Tor var også breførar og hadde turen frå Vetledalssæter over til Slæom og Sota som si spesialrute. For Tor, som var gardbrukar på Greidung, var hytta det kjæraste han eigde. Vetledalen var kongeriket hans. Tor Greidung døydde i 1999, og etter den tid har hytta vore mindre brukt. I fjor tok Den Norske Turistforening, ved Indre Nordfjord Turlag, over drifta av hytta gjennom leigekontrakt med noverande eigar, Ragnar Greidung.
Det har vore stor dugnadsinnsats av mange her. Indre Nordfjord Turlag understrekar at det er viktig med opne, tilgjengelege hytter der folk kan få varme seg, tørke klede og få seg mat og søvn.
Ferdselsveg over breen
Erdalen er ein sidedal til Strynedalføret som går like opp til Jostedalsbreen. Dette er ein gamal ferdelseveg over breen som fører inn til Jostedalsbreen og nasjonalparken. Jostedalsbreen Nasjonalpark vart oppretta i 1991 og er på heile 1310 km2.
Det er to oppstigningar frå Vetledalen til Jostedalsbreen. Den eine går til venstre opp til Vetledalsfossen. Denne ruta er mest vanleg å følge om ein skal gå “Josten på tvers”. Den vanlegaste ruta for “Josten på langs” går opp Stordalen forbi Ulvestigen, til Erdalsbreen og vidare inn på Jostedalsbreen. Begge rutene er t-merka. Brerute, breutstyr og brekunnskapar eller førar er sjølvsagt naudasynt for å ferdast på breen.