Turbeskrivelse

Like ved parkeringsplassen går du gjennom ei grind som fører inn i ei sankekvie for sauer. Du går vidare gjennom endå ei grind og følgjer stien langs gjerdet til du svingar 90 grader mot høgre opp ein bakke. Her er det relativt bratt og svingete heilt til Kvilefloten. Sjå kartet.

Vegen frå Kvilefloten slyngar seg lett oppover til Glomnessetra. Her passerer du to hytter som er sett opp i seinare tid, og eit gammalt steinsel som står til nedfalls.

Stien held fram med slak stigning innover dalen. Etter om lag 2 kilometer kan du sjå Nos/Bolstadsetra på eit høgdedrag på den andre sida av elva.

Etter at du har passert Nos, er det ikkje langt til Utfalla. Her går det store fonner som kan bli liggande til eit stykke ut på sommaren. Hugs at grova som renn under fonna, smeltar snøen frå undersida, og det kan vere utrygt å passere. Ver obs!

Det ligg ei enkel, lita bru over Tverrelva. Denne vert lagd til side kvar haust for at fonna ikkje skal øydelegge ho.

På Midtstøylen er det bygd ei hytte som har eit spesielt fonnvern.

I eldre tid var det mange setrehus nede ved elva her framme. Det var Hjelle si seter. I dag er det berre nokre ruinar att.

Når du passerer Midtstøylen, ser du Stol på eit høgdedrag lenger framme. Då er det knapt 1,5 kilometer att å gå.

Det er registrert mange kulturminne i området ved Stol. Du kan lese meir om dette i tillegget til denne turskildringa.

Dersom du har krefter til det, kan du gjerne gå eit lite kvarter vidare mot Stolsbotnen. Tett ved stien ligg ein flat stein med mange skålgroper. Desse skålgropene kan vere frå bronsealderen (1700-500 fvt.) og vart truleg brukte under religiøse rituale. Skålene er ca. 5 cm i diameter.

Det beiter sauer i dalen, hundar må gå i band.