Tur til Segestad
Turen til Segestad er ei stor naturoppleving, og på same tid er det ei innføring i kulturhistorie. Kven skulle tru at Segestad var ein av dei beste gardane i Oppstryn på slutten av 1800-talet?
I lada på Segestad har Svein Inge Sunde samla gamle reiskapar og sett opp informative plansjar som fortel historia til garden. Stovehuset er ope for alle som har interesse av å sjå innom.
Segestad Vener og Svein Inge Sunde har gjennom mange år gjort ein stor jobb med å halde husa på garden ved like.
Gradering: Middels vanskegrad. Nokre bratte parti.
Lengd: 1,5km ein veg.
Høgdemeter: 285
Tidsbruk: 2,5 timar t/r.
Sesong: Vår - haust
Parkering: Du kan parkere på parkeringsplassen som ligg ca. 200 meter frå Glomnestunet. Hugs å betale avgift!
Merk: Du passerer nokre høge stup. Gå ikkje for langt ut på kanten.
Turbeskrivelse
Frå parkeringsplassen ved Glomnes til Segestad er det 1,7 km å gå og knapt 300 høgdemeter. Du bør berekne 2 ½ time på heile turen.
Det er stor slitasje på stien. Nokre stadar kan det vere krevjande å gå. Ver forsiktig!
Du kan parkere på parkeringsplass 200 meter frå Glomnestunet mot avgift.
Du går langs den private vegen gjennom Glomnestunet og kryssar brua over Glomsdøla. Vidare følgjer du bilveg som svingar 90 grader til høgre opp ein bratt bakke.
Når du passerer tre hytter (Glomnes feriehytter), er det slutt på bilvegen, men det går sti vidare opp ein ny bratt bakke. Du kjem opp på ei flate der stien deler seg. Her kan du velje om du vil gå direkte til Segestad eller om du vil gå til utsiktspunktet mot Glomnesfossen. Det siste er å anbefale dersom du ikkje har vore der før.
Det er i seinare år bygd ei lita demning under fossen. Vatnet vert leia ned til eit minikraftverk.
Frå utsiktspunktet mot fossen kan du ta ein snarveg mot stien til Segestad. Sjå kartet.
Vegen vidare er heller bratt og underlaget er ujamt, men med godt skotøy går det nok bra.
Når du kjem til Hamrane, eit bratt parti der stien svingar seg oppover i ein fjellhammar, kan du gjerne ta ein avstikkar til Hellskora.
Hellskora er eit imponerande utsiktspunkt som viser Oppstrynsvatnet omkransa av høge fjell og brear. Gå ikkje for langt ut på kanten!
Når du har passert Hamrane, kjem du til Storekvile. Her kan du setje deg på ein benk og nyte utsikta.
Stien går vidare forbi Langhammarkvile og Nedstelada, og så er du straks framme ved husa på garden.
Når du kjem til Segestad, bør du ta ein tur innom låven. Her finn du eit lite gardsmuseum med gamle reiskapar og plansjar som fortel historia om denne fjellgarden. Det er Svein Inge Sunde som har laga utstillinga.
Stovehuset står slik som det var då den siste brukaren fall bort i 1961. Det står ope for dei som vil ta ein titt.
Like ovafor husa kan du sjå murane etter ein husmannsplass som vart teken av snøras i 1902.
Glomnesvegen med utsyn mot Glomnestunet til høgre og Storskredfjellet (Breifonna) i bakgrunnen.
Parkeringsplassen ved Glomnes. Hugs å betale.
Hellskora
Storekvile
Langhammarkvile
Nedstelada er restaurert av Svein Inge Sunde og er no i god stand. Her lagra dei høy og lauvkjerv i gammal tid.
Spelhuset på Segestad. Inne i dette bygget står ein vinsj (spel) med ein elektrisk motor som drivkraft. Vinsjen (spelet) rommar ein vaier som når heilt ned til Glomnes.
Her ser du eldhuset på garden, eller “ostehuset” som dei også sa. Det var berre restar av murane som stod att då Svein Inge Sunde bygde det opp att. Huset vart i si tid brukt til alt arbeid som hadde med varme å gjere; ysting, kinning og baking, derav namnet. Eldhuset vart teke av ein av dei mange stormane som har herja og øydelagt hus på Segestad. Taket på stovehuset har blåse av tre gongar opp gjennom åra.
Stovehuset, låven og Spelhuset ligg på ei rekkje.
Låven. Vi kan sjå stovehuset bakafor.
Taubana til Segestad
Utsyn frå Segestad
Husa på Segestad. Ruinane etter husmannsplassen i framgrunnen
