Tur til Glomnesnakken
Turen til Glomnesnakken er den kortaste og lettaste fjellturen du kan gå i Oppstryn. På toppen får du eit majestetisk utsyn over Oppstrynsvatnet og dei mektige fjella og breane ikring. I godt vêr er dette ei naturoppleving du vil hugse!
Gradering: Middels vanskegrad. Eit bratt og litt vanskeleg parti mot slutten.
Lengd: 2,5km ein veg.
Høgdemeter: 620
Tidsbruk: 4 timar t/r.
Sesong: Sommar - haust
Parkering: Du kan parkere på parkeringsplassen som ligg ca. 200 meter frå Glomnestunet. Hugs å betale avgift!
Merk: Det bratte partiet ved toppen kan vere krevjande på vått og glatt underlag.
Turbeskrivelse
Turen til Glomnesnakken er den kortaste og lettaste fjellturen du kan gå i Oppstryn. På toppen får du eit majestetisk utsyn over Oppstrynsvatnet og dei mektige fjella og breane ikring. I godt vêr er dette ei naturoppleving du vil hugse!
Avstanden til toppen er 2,5 km, og det er litt over 600 høgdemeter. Du bør berekne 4 time på heile turen.
Dersom du er godt trena, kan du gjerne gå rundturen om Segestad når du kjem ned frå toppen. Sjå “Rundtur i Glomsdalen”.
Du kan parkere på parkeringsplassen som ligg 200 meter frå Glomnestunet. Hugs å betale avgift!
Like ved parkeringsplassen går du gjennom ei grind som fører inn i ei sankekvie for sauer. Du går vidare gjennom endå ei grind og følgjer stien langs gjerdet til du svingar 90 grader mot høgre opp ein bakke. Her er det relativt bratt og svingete heilt til Kvilefloten. Sjå kartet.
Vegen frå Kvilefloten slyngar seg lett oppover. Det er ikkje langt før du kjem til eit skilt som viser retninga mot Glomnesnakken.
Det første partiet mot Glomnesnakken er svært bratt, men ufarleg. Stien svingar seg opp langs ein rygg i bjørkeskogen, men flatar litt ut før du kjem til ei bratt kneik med litt klatring. Her må du vere forsiktig når det er vått og sleipt!
Når du har passert denne kneika, er du straks på toppen. Her får du eit flott utsyn!
Det er ikkje mange stader i landet at ein finn fjell som ragar så høgt over dalbotnen som i Oppstryn. Frå Glomnesnakken får ein eit mektig utsyn mot mange av desse fjella. Sjå lista.
Lodalskåpa - 2083 moh.
Tomefjellet - 1835 moh.
Middagshyrna - 1857 moh.
Tundraskarbreen
Bings Brekuppel - 1877 moh.
Nonshyrna - 1510 moh.
Tindefjell - 1775 moh.
Kampen - 1640 moh.
Høgdene på fjella er henta frå kartet på ut.no.
Parkeringsplassen ved Glomnes. Hugs å betale avgift.
På veg mot Kvilefloten
Kvilesteinen på Kvilefloten. Steinen er flat og fin å sitje på, og høgda er høveleg. Stien opp Glomneskleiva (frå Glomnes til Kvilefloten) er bratt, og det kan vere godt å få kvile litt her.
På veg mot Glomnesnakken. Utsyn innover Glomsdalen. Dersom du zoomar inn bildet, kan du sjå både Glomnessetra, Segestad- setra og Nos/Bolstadsetra.
Stien flatar ut før du kjem til det brattaste partiet på turen. Du kan skimte Glomnesnakken bak bjørkeskogen.
Siste del av turen byr på litt klatring. Her må ein gå forsiktig, særleg når det er vått og sleipt.
Glomnesnakken (650 moh.). I bakgrunnen ser vi Skåla (1848 moh.) og Storskredfjellet med breen i midten (1815 moh.)
