Bygdeprisen til Marie Johanne og Bjarne
17. mai vart Bygdeprisen delt ut av Oppstryn Bygdeutviklingslag, og årets pris vart tildelt Marie Johanne Folven og Bjarne Greidung. Årets pris er måla av Unni Berge.
Her er juryen si begrunning:
Om Bjarne Greidung
Bjarne er fødd i 1935 og har vore gardbrukar på Segestadbruket på Greidung frå unge år og fram til pensjonsalder. Han har alltid hatt interesse for lokalhistorie og likar å skrive. Han har samla mykje stoff om slekta både på Greidung og Aaning. Historier om grannelaget har det og kome. Bjarne skriv og dikt – både humoristiske og vakre og kjenslevare. Ein del av det han har skrive har vore publisert i «Fjordingen», i «Årdølen», ei skuleavis for Erdal skulehus, og i årbøkene til Stryn historielag. Litt har vel hamna i skrivebordskuffa og. Fleire hefte og tre bøker er utgjevne. Dette året har han og Marie-Johanne samla historia om slekta, spesielt på Greidung, og diverse andre artiklar, i eit hefte på 171 sider. Dette er ikkje gjeve ut offentleg, men delt ut til slektningar.
Dette er noko av det han har skrive:
1998 Det er snart gløymt. Om slekta på Greidung.
1998 Det er snart gløymt. Om slekta på Aaning.
2002 Erdal krets- frå farne dagar. Utgjeve på eige forlag
2004 Ei terne. Publisert i årboka til Stryn historielag.
2007 Det tome hus. Dikt publisert i årboka til Stryn historielag.
2009 Håkon og Huldremartin. Ei barnebok, utgjeve på eige forlag
2010 Min barneheim i den grøne lida (tida)… Eit hefte
2014 Kvie-Lars. Publisert i årboka til Stryn historielag.
2021 Erdalsvegen i gamle dagar. «Årdølen» og årboka til Stryn historielag.
2022 Bjarne ser seg tilbake. Publisert i årboka til Stryn historielag.
2022. Kvielars-hellaren – eit kulturminne. Årboka til Stryn historielag.
2023 Tankar over tid. Diktbok i lag med brørne Lars og Erling. Lyrikkforlaget
I tillegg har Bjarne halde tradisjonen med å lage geitost ved like, og er kjend for den gode osten sin!
Marie-Johanne Folven
Marie-Johanne er fødd i 1956. Ho har budd på Greidung sidan 1980. Ved sida av å vere lærar, dreiv ho geitegard i lag med Bjarne. Dei to har produsert prima geitost i det vesle eldhuset sidan tidleg på 1980-talet – og geitost vert det framleis laga.
Ved å digitalisere tekstane til Bjarne har ho bidrege til å gjere dei kjende for oss andre.
Marie-Johanne er ei allsidig dame. Ho dreiv damekor på 1980-talet. Ein stor jobb var det å ta initiativ til å ta vare på fjellgarden Segestad; og å starte Segestad vener, der ho var leiar i 17år.
Eit av dei aktive forsamlingshusa i bygda er Betel, der er hyggestund ein gong pr månad, basar og juletrefest m.a. Marie-Johanne er primus motor der. Ho er også leiar i styret for Erdal skulehus, der det er ymse aktivitetar: dugnad, sommarkafè, haustmarknad, vinterkafè og sjakkspeling. Vi har gjerne ikkje fått med alt Marie Johanne har styra med i bygda, ho har ein finger med i så mangt. Til sist, men absolutt ikkje minst må det nemnast at når her kjem innflyttarar til bygda, er Marie-Johanne på pletten og tek i mot dei og hjelper til, særleg har ho vore til stor hjelp for familiar som kjem frå andre land!
Desse to er begge verdige vinnarar av bygdeprisen for 2024. Vi gratulerer!